کورس کے تعارف سے قبل میں انسٹرکٹر یعنی اپنا تعارف کرواتا چلوں۔ میرا نام محمد اویس پراچہ ہے اور میرا کرپٹو کرنسی کی دنیا سے 2016ء سے واسطہ ہے۔ میری تعلیم درس نظامی (آٹھ سالہ عالم کورس)، تخصص فی فقہ المعاملات المالیہ (مفتی کورس)، ایم بی اے (فنانس) اور ایم فل (اسلامک اسٹڈیز ود کمپیوٹر سائنس) ہے۔ بٹ کوائن اور کرپٹو کرنسیز کی بنیادی شکل پر میں نے 2017ء میں تحقیق کی اور ایک مقالہ لکھا  جس کا نام “ورچوئل کرنسیوں کی شرعی حیثیت” رکھا۔ یہ مقالہ انٹرنیٹ پر پی ڈی ایف میں دستیاب ہے۔  اس کے علاوہ اپنے “اسلامک اسٹڈیز ود کمپیوٹر ٹیکنالوجی” میں ایم فل کے دوران اس کی شرعی حیثیت اور اس میں آنے والی جدید تبدیلیوں پر ایک مقالہ لکھا جو ابھی شائع نہیں ہوا ہے لیکن ایچ ای سی کی ریپوزٹری سے لیا جا سکتا ہے۔ اس کے علاوہ کراچی یونیورسٹی، فاسٹ یونیورسٹی، جامعۃ الرشید اور دیگر اداروں میں کرپٹو کرنسیز پر سیشن اور لیکچرز دے چکا ہوں۔ زیر نظر ویب سائٹ (بوٹ سلیش) بھی ہماری ہے جہاں آپ میرے تحریر کردہ کرپٹو پر کئی مظامین دیکھ سکتے ہیں۔

میں 2016ء سے ہی ذاتی طور پر مختلف کاروباروں سے وابستہ ہوں جن میں فنانشل مارکیٹس بھی شامل ہیں۔ فنانشل مارکیٹ اس مارکیٹ کو کہا جاتا ہے جہاں فنانشل انسٹرومنٹس (ایسی چیزیں جو اپنی مالیت رکھتی ہوں) کا کاروبار کیا جاتا ہے۔ کاروبار، اس کے مسائل اور ان کے حل، طریقہ کار اور جدید تھیوریز پر ہفت روزہ “شریعہ اینڈ بزنس” میں کافی مضامین لکھتا رہا ہوں۔ ان میں سے چند مضامین پر مشتمل ایک کتابچہ “نیا کاروبار کیسے کریں” پی ڈی ایف کی شکل میں انٹرنیٹ پر دستیاب ہے جس میں میں نے بہت سے اہم حصوں کو کور کیا ہے۔ علمی طور پر 2024ء تک جامعۃ الرشید کے دار الافتاء سے منسلک رہا ہوں اور دیگر فتاوی کے ساتھ آئی ٹی کے مسائل سے متعلق کئی فتاوی بھی تحریر کیے ہیں۔ یوں میری تعلیم  اور تجربہ، دونوں ہی کمپیوٹر، آئی ٹی، شرعی علوم اور کاروبار کے ارد گرد گھومتے ہیں۔

دی کرپٹوورس کورس کا آغاز 2021ء میں اس وقت ہوا تھا جب میں نے یہ محسوس کیا کہ اردو جاننے والے حضرات کے لیے کرپٹوکرنسی جیسی فنانشل مارکیٹ کو سمجھنا انتہائی اہم ہے۔ یہ وہ وقت تھا جب بہت سے کرپٹو کرنسی ماہرین مختلف کورسز کروا رہے تھے۔ میں نے ان کورسز کو دیکھا تو مجھے ان میں سے کئی پر اطمینان نہیں ہوا۔ میری رائے میں یہ ایک فنانشل مارکیٹ کو اس طرح نہیں سمجھا رہے تھے جیسے اس کا حق ہوتا ہے۔ فنانشل مارکیٹ صرف بیچنے اور خریدنے یا چارٹ دیکھنے کا نام نہیں ہوتی بلکہ اس میں فنڈامینٹل، اسٹریٹجی، رسک مینجمنٹ اور لاس ریکوری جیسی کئی چیزیں بھی ہوتی ہیں۔ ان سب کے بغیر ٹریڈر اس میں جا کر پھنس جاتا ہے۔

چونکہ میرا تجربہ اور تعلیم، دونوں اس میدان کے تھے تو میں اس بات کو سمجھتا تھا۔ لہذا میں نے ایک ایسے کورس کا آغاز کیا جو ان تمام چیزوں کو بنیادی طور پر سمجھا سکے۔ یہ درست ہے کہ ان سب کی سمجھ کافی تجربے کے بعد آتی ہے لیکن بنیادیں کوئی شخص اس کورس سے سیکھ سکتا ہے اور ان پر پریکٹس سے خود کو ماہر بنا سکتا ہے۔ یہ بھی یاد رکھنا چاہیے کہ ہر شخص ہر مارکیٹ کے لیے مناسب نہیں ہوتا اور نہ ہی ہر مارکیٹ ہر شخص کے لیے  آسان ہوتی ہے۔ لیکن اس کا علم  بھی سیکھنے سے ہوتا ہے۔ ایک اچھی بات یہ ہے کہ فنانشل مارکیٹس میں اگر اپنی صلاحیتوں کو تول کر کام کیا جائے تو یہ اکثر لوگوں کو فائدہ پہنچاتی ہیں۔